‘यो सरकारले मलाई जिउँदै छोड्नु नै मेरो जित हो’ : रवि लामिछाने

काठमाडौं । राष्ट्रिय स्वतन्त्र पार्टीका सभापति रवि लामिछानेले वर्तमान सरकारको आलोचना गर्दै आफूलाई जिउँदै छोड्नु नै सरकारविरुद्धको ठूलो विजय भएको बताएका छन्। लामो समयपछि पार्टी बैठकमा सहभागी हुन केन्द्रीय कार्यालय पुगेका लामिछानेले सरकारले षड्यन्त्रपूर्वक झूटा आरोप लगाएर आफ्नो राजनीतिक जीवन समाप्त गर्ने प्रयास गरेको आरोप लगाए।

उनले सरकारको नियतमाथि प्रश्न उठाउँदै भने, “मेरो परिवार र आफन्तलाईसमेत जानकारी नदिई, मलाई रातको मध्यरातमा दासढुंगाको बाटोबाट किन लगियो? यो सरकारको नियत असल छैन।” उनले आफू राजनीति त्याग्नका लागि नभई, हरेक चुनौतीको सामना गर्नकै लागि आएको स्पष्ट पारे।

लामिछाने सोमबारदेखि पुनः सभापतिको भूमिकामा सक्रिय हुँदैछन्। पार्टी केन्द्रीय कार्यालय पुगेका उनलाई नेता तथा कार्यकर्ताले भव्य स्वागत गरे। बैठक सुरु हुनुअघि कार्यालय परिसरमै बोल्दै उनले “म कहिल्यै हार मान्ने छैन” भन्ने दृढता व्यक्त गरे।

प्रकाशित मिति: १७ चैत्र २०८१, सोमबार