काठमाडौं । पूर्वप्रधानमन्त्री डा. बाबुराम भट्टराईले पूर्वराजा ज्ञानेन्द्र शाहका पछिल्ला गतिविधिबारे गम्भीर प्रश्न उठाउँदै तीन महत्वपूर्ण सुझाव प्रस्तुत गरेका छन्।
प्रधानमन्त्री केपी शर्मा ओलीले आयोजना गरेको सर्वदलीय बैठकमा सहभागी भएका भट्टराईले पूर्वराजा ज्ञानेन्द्रको गतिविधिबारे गहिरो छानबिन गरी कानुनी कारबाही अघि बढाउनुपर्ने धारणा राखे। बैठक चलिरहेका बेला सिंहदरबारबाट बाहिरिँदै उनले पत्रकारहरूसँग कुरा गर्दै ज्ञानेन्द्र शाहले अझै पनि आफूलाई राजा नै भएको भ्रम पालेर हिँडिरहेको र १५ गते काठमाडौंमा भएको घटना उनकै निर्देशनमा भएको दाबी गरे।
‘नेपालको संविधानसभाले राजतन्त्रलाई उन्मूलन गरिसकेको छ। उनी अब साधारण नागरिकका रूपमा रहनुपर्ने हो, तर ज्ञानेन्द्रले अझै पनि “श्री ५” को हैसियतमा ठगी गर्दै हिँड्ने कार्य गरिरहेका छन्,’ भट्टराईले भने। ‘यसरी संविधान विपरीत गतिविधि गर्ने व्यक्तिलाई कानुनी कारबाही गर्नु जरुरी छ। साथै, १५ गतेको घटनाबारे पनि गहिरो छानबिन हुनुपर्छ।’
भट्टराईले लोकतन्त्रको रक्षा पहिलो प्राथमिकता भएको बताउँदै व्यवस्था उल्ट्याउने कुनै पनि प्रयासलाई रोक्न सबै पक्ष एकजुट हुनुपर्ने धारणा राखे। ‘राजनीतिक रूपमा मतभेद हुन सक्छ, तर लोकतान्त्रिक प्रणालीको रक्षा गर्नु सबैको दायित्व हो,’ उनले थपे।
प्रकाशित मिति: १६ चैत्र २०८१, आइतबार
प्रतिक्रिया