काठमाडौं – नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आइतबार सिन्धुली जिल्लाको दुधौली नगरपालिकामा आयोजित कार्यक्रममा पूर्वराजा ज्ञानेन्द्र शाहलाई कडा शब्दमा आलोचना गर्दै ‘अपराधी भिलेन’ को रूपमा चित्रण गरेका छन्।
शुक्रबार राजावादीहरूले देशभर गरेका प्रदर्शनबारे प्रतिक्रिया दिँदै प्रचण्डले ती घटनाहरू ज्ञानेन्द्र शाहकै निर्देशनमा भएको आरोप लगाए। उनले राजतन्त्र पुनर्स्थापनाका लागि भइरहेको गतिविधि जनताको र राजनीतिक दलहरूको सहनशीलताको दुरुपयोग भएको भन्दै कडा आपत्ति जनाए।
प्रचण्डले देशमा अशान्ति फैलाउने प्रयासलाई अब सह्य नहुने भन्दै पूर्वराजालाई खुला छोड्न नसकिने चेतावनी दिए। कार्यक्रममा आफूलाई ‘नायक’ को रूपमा प्रस्तुत गर्दै उनले ज्ञानेन्द्रलाई ‘भिलेन’का रूपमा चित्रण गरे।
उनको अभिव्यक्तिले राजनीतिक वृत्तमा नयाँ तरङ्ग ल्याएको छ भने पूर्वराजावादी खेमाबाट यसको कडा प्रतिक्रिया आउन सक्ने अनुमान गरिएको छ।
प्रकाशित मिति: १७ चैत्र २०८१, सोमबार
प्रतिक्रिया