काठमाडौं । माओवादी केन्द्रका अध्यक्ष पुष्पकमल दाहाल ‘प्रचण्ड’ले आगामी निर्वाचनमा आफ्नै बलबुतामा प्रतिस्पर्धा गर्ने दृढता व्यक्त गरेका छन्। शनिबार आयोजित एक राजनीतिक प्रशिक्षण कार्यक्रममा उनले माओवादी अब नेपाली कांग्रेस वा नेकपा (एमाले) जस्ता दलहरूसँग गठबन्धन नगरी स्वतन्त्र रूपमा चुनावी प्रतिस्पर्धामा जाने स्पष्ट पारे।
उनले भने, “अब आउने निर्वाचनमा माओवादी केन्द्रले कुनै दलसँग गठबन्धन गर्ने छैन। हामी आफ्नै विचार, नीति र जनताको समर्थनको बलमा चुनावी मैदानमा उत्रिनेछौं। सन् २००८ (वि.सं. २०६४) मा जसरी आफ्नै एजेन्डा र जनताको शक्तिको आधारमा अघि बढेका थियौं, अब फेरि त्यही मार्ग अनुसरण गर्ने निष्कर्षमा पुगेका छौं।”
अध्यक्ष प्रचण्डले पार्टीभित्र देखा परेका कमजोरी, गुटबन्दी र अराजक प्रवृत्तिहरू तत्काल अन्त्य गर्नुपर्ने आवश्यकता औंल्याए। पार्टीको संगठनात्मक गतिशीलता अपेक्षित रूपमा अगाडि बढ्न नसकेको उनले स्वीकारे।
उनले भने, “हाल माओवादी केन्द्रभित्र गुटबन्दी, अराजकता र व्यक्तिवादी सोच अत्यधिक हावी भएको देखिन्छ। पार्टीको संगठनात्मक सशक्तिकरण जुन गतिमा हुनुपर्ने थियो, त्यो हुन सकेको छैन। अब यो अवस्थालाई तोडेर नयाँ यथार्थतिर र नयाँ प्रक्रियातिर अघि बढ्ने हाम्रो संकल्प छ।”
प्रचण्डले पार्टीलाई एकताबद्ध बनाउन र जनतामाझ पुनः लोकप्रिय बनाउन पार्टीभित्र आमूल सुधार आवश्यक रहेको स्पष्ट पारे। उनले माओवादी केन्द्रलाई फेरि जनताको सशक्त पार्टीका रूपमा स्थापित गर्ने प्रतिबद्धता व्यक्त गरे।
प्रकाशित मिति: १ चैत्र २०८१, शनिबार
प्रतिक्रिया