संविधान संशोधन गरेर जनताको अधिकार कटौती गर्न खोजिएको ‘प्रचण्ड’को दाबी

अध्यक्ष ‘प्रचण्ड’ले संविधान संशोधनको पक्षमा आफूहरू रहेपनि जनताको अधिकार कटौती गर्न खोजिएकाले विरोध र आलोचना गरिएको बताए । उनले भने, ‘हामी संविधान संशोधनको विरोधी होइन । अहिलेसम्म प्राप्ति र उपलब्धिमा टेकेर अझ त्यसलाई परिमार्जन गर्नका लागि जनतामा अझ धेरै अधिकार दिनको लागि देशका उत्पीडित सबै जाति वर्ग क्षेत्र, समुदायलाई अझ बढी अधिकार सम्पन्न बनाउनको लागि संविधान संशोधनको पक्षमा हामी छौँ । तर अहिलेको सरकारको प्रकृति, विगतको इतिहास, पृष्ठभूमि सबै हेर्दा उनीहरूले खोजेको परिमार्जन होइन । जनतालाई सम्पन्न बनाउनको लागि होइन । जनताको अधिकार कटौती गर्ने उद्देश्यले भएकाले हामीले त्यसको खण्डन, आलोचना गरेका हौँ ।’

अध्यक्ष ‘प्रचण्ड’ले दुई वटा पार्टी मिलेर संविधान संशोधन गर्न नसकिने बताए । उनले प्रतिनिधि सभा र राष्ट्रिय सभाको सङ्ख्याले गर्दा संविधान र कानुन अनुसार संविधान संशोधन गर्न नसकिने बताए । उनले जनताले प्राप्त गरेको समावेशिता र समानुपातिकको अधिकारलाई कटौती गर्ने प्रयास गरेमा विगत जस्तै पुनः सडकमा आउने बताए ।

यस्तै अध्यक्ष ‘प्रचण्ड’ले निर्वाचन प्रणालीमा सुधार गर्न आवश्यक रहेको पनि बताए । उनले भने, ‘तर उहाँहरूले सोचको निर्वाचन प्रणालीमा संशोधनको मनसाय र हाम्रो सोचमा फरक छ । हामी अझ बढी समावेशी, समानुपातिक बनाउनुपर्छ भन्छौँ । तर उहाँहरू त्यसको कटौती गर्नको लागि संशोधन गर्न खोज्दै हुनुहुन्छ ।’

अध्यक्ष ‘प्रचण्ड’ले दुई पार्टी प्रणाली बनाउन खोजिएको भन्दै त्यसमा आफूहरूको आपत्ति रहेको बताए । उनले पश्चिमाको नक्कल गदै नेपालमा पनि दुई पार्टी प्रणाली गरिए राम्रो नहुने बताए । पूर्वसमानुपातिक निर्वाचन प्रणाली र प्रत्यक्ष निर्वाचित कार्यकारिणी प्रमुख हुनुपर्ने बताए ।