काठमाडौं । आगामी प्रतिनिधिसभा निर्वाचनका लागि नेपाली कम्युनिष्ट पार्टीले अघि सारेका उम्मेदवारहरूलाई लिएर राजनीतिक वृत्तमा बहस सुरु भएको छ। विशेषगरी पार्टीका संयोजक पुष्पकमल दाहाल ‘प्रचण्ड’ र सह–संयोजक माधव कुमार नेपालको परिवारसँग सम्बन्धित व्यक्तिहरू विभिन्न निर्वाचन क्षेत्रबाट उम्मेदवार बनेपछि परिवारवाद को विषय उठ्न थालेको हो।
पार्टी स्रोतका अनुसार संयोजक प्रचण्ड स्वयं रुकुम पूर्वबाट उम्मेदवार बनेका छन्। उनका परिवारबाट बुहारी विना मगर कञ्चनपुर–१ र छोरी रेणु दाहाल चितवन–३ बाट उम्मेदवार रहेका छन्। यस्तै सह–संयोजक माधव कुमार नेपाल रौतहट–१ बाट उम्मेदवार बनेका छन् भने उनका सम्धी सोमप्रसाद पाण्डे पाल्पा–२ र भान्जा नितेश पौडेल काठमाडौँ–२ बाट उम्मेदवार बनाइएको बताइन्छ।
यसरी शीर्ष नेतृत्वका परिवारका सदस्यहरू एकैपटक प्रत्यक्ष निर्वाचनमा अघि सारिनुले पार्टीभित्र र बाहिर प्रश्न उठेको छ। लामो समयदेखि संगठनमा काम गर्दै आएका क्याडर र नेताहरू पन्छाइएर नातागोता र पारिवारिक सम्बन्धका आधारमा टिकट वितरण गरिएको हो कि भन्ने जिज्ञासा देखिएको छ।
राजनीतिक विश्लेषकहरूका अनुसार कम्युनिष्ट आन्दोलनले सैद्धान्तिक रूपमा व्यक्तिवाद र वंशवादको विरोध गर्दै आएको भए पनि व्यवहारमा यस्तो प्रवृत्ति दोहोरिनुले पार्टीको लोकतान्त्रिक अभ्यास कमजोर देखिने खतरा हुन्छ। उनीहरू भन्छन्, उम्मेदवार छनोट प्रक्रिया पारदर्शी नदेखिँदा जनतामा नकारात्मक सन्देश जान सक्छ।
पार्टी नेतृत्व भने उम्मेदवार छनोट राजनीतिक अनुभव, क्षेत्रीय प्रतिनिधित्व र संगठनात्मक योगदानका आधारमा गरिएको दाबी गर्दै आएको छ। तर आलोचकहरूका अनुसार एउटै परिवारबाट धेरै उम्मेदवार अघि सारिँदा योग्यता र अवसरको समानतामाथि प्रश्न उठ्नु स्वाभाविक हुन्छ।
निर्वाचन नजिकिँदै जाँदा टिकट वितरण, आन्तरिक लोकतन्त्र र नेतृत्वको भूमिका सम्बन्धी बहस अझ चर्किने संकेत देखिएको छ।
प्रकाशित मिति: ५ माघ २०८२, सोमबार
प्रतिक्रिया